ТҮРЭГИЙН ҮЕД ХОЛБОГДОХ БУНХНЫ ОЛДВОРУУДЫГ СЭРГЭЭН ЗАСВАРЛАХ АЖИЛ ЯВАГДАЖ БАЙНА

2008 онд Төв аймгийн Заамар сумын нутаг Шороон бумбагар хэмээх газарт Нүүдлийн соёл иргэншлийг судлах олон улсын хүрээлэн, ОХУ-ын ШУА-ын Сибирийн салбар Монгол Төвд Буддын судлалын хүрээлэнтэй хамтарсан судалгааны ангийн судалгаа, археологийн малтлагын явцад МЭ-ний 678 оны үед холбогдох Түрэгийн үеийн цэргийн жанжинд зориулсан бунхныг нээснээр, Түрэг улсын түүх соёл, шашин шүтлэг, угсаатны зан үйлийг илэрхийлсэн олон тооны дурсгалууд олдсон юм.

Энэ бунхныг цаг хугацааны уртад тонуулчид ухаж , олдворуудыг их хэмжээгээр эвдэж сүйтгэсэн тул анхны хэлбэр төрхөө хадгалсан олдвор цөөн тоотой үлдэж, ихэнх нь хагарч эвдрэн байршил, төрхөө алдаж, удаан хугацааны туршид газрын чийгний нөлөөлөлд байснаар, мод даавуун материалуудаар хийгдсэн зүйлс нь өмхөрч өгөршин хэврэгшиж, түүхий шавараар бүтээсэн олдворуудад задарч бутрах хэлбэрээр муудах үйл явц эрчимтэй явагдсан байв. Зарим биет олдворууд хэсэг хэсгээр задарч бутарснаар эвлүүлж сэргээн засварлах боломжгүй болжээ.

2009 онд нэн даруй бэхжүүлж хамгаалах шаардлагатай олдворуудыг цэвэрлэж бэхжүүлэх ажлыг гүйцэтгэж 2010 оны 8-р сараас эхлэн бүх олдворыг цэвэрлэн бэхжүүлж, сэргээн засварлах, анхны хэлбэр төрхт ойртуулан сэргээж босгох, цөөн тооны бүтэн олдворуудын хуулбарыг хийх зэрэг үйл ажиллагаа Соёлын өвийн төвийн сэргээн засварлах хэлтэст үргэлжилж байна .

Сэргээн засварлах үйл ажиллагаа дууссанаар эдгээр түүхийн чухал олдворуудыг Занабазарын нэрэмжит Дүрслэх урлагийн музейн үзмэрийн сан хөмрөгт бүртгэж авах аж.Эх сурвалж: http://monheritage.mn/mn/news/NewsMore.aspx?ItemID=12